«Книга толкований и нравоучений» Аввакума [Толкования на псалмы] Совет мужа грешна к хотящим спастися. Псалом Давыдов 102: «Благослови, душе моя, Господа, и вся внутренняя моя имя святое Его». Толк. Виждь, душе, Христа закалаема на божественней трапезе, не беседуй, окаянная, со други своими, Бога бо прогневавши, многогрешная, но благослови Господа внутренем сердцем и имя Его пресвятое. Псалом: «Благослови, душе моя, Господа и не забывай всех воздаяний Его».
Толк. Душе моя окаянная, душе страстная, ужаснися, зрящи
таинства преславная, и воздохни, и прослезися в перси биющи
и глаголющи: «Боже, очисти мя, яко же и блуднаго!» Не забывай,
окаяная, воздаяния Его, паче же от небытия в бытие приведе тя; тебе ради сотворил землю и небо, яко
комару чюдну устроил; солнце, и луна, и
звезды тебе служат, и вся видимая тварь тебе трепещет; «не забывай всех воздаяний Его». Псалом: «Очищающего
вся беззакония твоя и исцеляющаго вся недуги твоя». Толк. Виждь, душе, ино преславное и ангелом удивително: отпадшую тя ис породы в грязь и
язвою неисцелною уязвленну очистил и исцелил смотрением
своим и бытием на земли
Сын, СловоБожие, и Бог. «Благослови,
душе моя, Господа!» Псалом: «Избавляющего
от истления живот твой, венчающаго тя милостию и щедротами».
Толк. Дивна
дела Твоя, Господи! Избавил от тля, еже есть от ада свободил, и, на небо возведе, венцем почтил; щедротами и милостию исполнил.
О сем, по писанному, да возрадуется душа моя о Господе: облече
бо ся в ризу спасения и
одеждею веселия обложи мя, яко жениха,венец возложи на мя и яко невесту
украси мя красотою. Псалом: «Исполняющаго
во благих желание твое». Толк. Ну, душе, что ино лучше того? Небо тебе дано и все благое
в нем, еже есть святая церковь. Исполняй во благих желание твое, во псалмех, и пениих, и
песнех духовных. А аще обетшала
ипаки грехми отяготилась, обновляйся святым покаянием, яко же рече пророк. Псалом: «Обновится,
яко орлу, юность твоя». Толк. Чти Алфавит, да разумевши, како обновляется орел. Аще внимаеши, то и аз ти
повем. Егда состареется орел и обетшает весь,
тогда обретает источник воды чисты и возлетает выспрь
с великим трудом, еже есть в высоту, взимается
к небесному огню, сиречь близ солнца подлетит, иобгорит вся
ветхость на нем; он же паки возвращается на преже реченный источник чистыя воды и измывается доволно в нем,
и, паки опернатев, бывает юн вместо ветха. Ну, душе, сотвори и ты так.
Аще обетшала грехми, да обновится, яко орлу, юность твоя; так же прибеги ко огню небесному, попаляющему терние наших грехов. С Павлом реку:
«Бог наш огнь поядаяи есть». И измойсячистою
водою естественною, еже есть крестися во вторые, по Писанию, понеже второе крещение грешнику — слезы и покаяние. «Да обновится, яко орлу, юность твоя». Псалом: «Творяи
милостыню Господь и судьбу всем
обидимым». Толк. Милость Господня неизреченна бывает кающимся и избавляет обидимых от бесов и от всяких бед и зол, яко
же Великий Василий рече: «Иже праведники любя и грешных милуя, иже всех зовыи ко спасению, обещания ради будущих благ».
Псалом: «Сказа пути своя Моисеови, сыновом Израилевом хотения своя».
Толк. Разумееши ли, когда сказа пути своя Моисеови? (Чти Второзаконие, глава 9-я и 20). — Егда на Синайстей горе пространно беседова с ним, яко же писано; не приступаете бо к горе, осязаеме и погоревшей огнем; и облаку, и сумраку, и буре, и трубному звуку, и гласу шумящу, глагол; или зверь
прикоснется горе — то убо камением побиен будет. И тако страшно бе видение. Моисей бо вопрошаше, а Бог отвещеваше, «сказа пути своя Моисеови». Псалом: «Щедр и милостив Господь, долготерпелив и многомилостив; не до конца прогневаетца, ни в век враждует». Толк. А как не милостив! Безумный Израиль, видев во Египте велия Божия чудеса: егда Египтаказнил, и море проведе, аки по cyce земли, и враги их потопил; а однако отступили от Бога и поклонишася телцу, егда Моисей был на горе. Господь к Моисею рече: «Соблудиша людие твои, отступиша от Мене». И предаде их воем небесным служити, а не прогневался до конца. Псалом: «Не по беззаконием нашим сотворил есть нам, ни по грехом нашим воздал естьнам». Толк. Терпит Христос всякому грешнику, ожидая покаяния его; не воздает здесь противо дел
его злых, но ища спасения его, наказует, святым Писанием вразумляя, яко же Моисея, раба своего, на Синайстей горе. Псалом: «Яко по высоте небесней от земля утвердил есть Господь милость свою на боящихся Его». Толк. Ей, твердо милует всех, изряднее же боящихся Его. Яко небо твердо утвердил над землею, тако милость свою над рабы своими. Псалом: «Елико отстоят востоцы от запад, удалил есть от нас беззакония наша». Толк. Далече праведнии удаляются от пути беззаконна и всякаго греховнаго вида. Яко восток отзапада отстоит, тако от "праведника Богом отгонима всякая нечистота. Псалом: «Яко же щедрит отец сыны, ущедрит Господь боящихся Его». Толк. Милует здесь рабы своя, и в будущем царство небесное обещевает. Не тако нечестивии, нетако, но яко прах, его же возметает ветр от лица земли. Не воскреснут судитися, но мучитися; праведный же от веры жив будет в них. Ныне же равны вси здесь, на земли, нечестивии же и паченаслаждаются. Псалом: «Яко той позна создание наше». Толк. Кому, кроме Бога, знать про грешных и праведных! Вся пред очима Его. И несоделанная наша видят очи Его. Псалом: «Помяну, яко персть есмы. Человек, яко трава, дние его, яко цвет селный, тако отцветет». Толк. Удивляется пророк человеку созданному, понеже яко земля или яко трава разцветет и
паки отцветет; на мало время, бедной, повеличается здесь, и паки не вем, куды пойдет. Псалом: «Яко дух пройдет в нем, и не будет, и не познает к тому места своего». Толк. Егда душа от тела разлучится, к тому не познает места своего. До общаго востания не входит в тело, аще и праведна. Псалом: «Милость же Господня от века и до века на боящихся Его, и правда Его на сынех сынов, хранящих завет Его, и помнящих заповеди Его творити я». Толк. Грешнику кающемуся по благодати милостив бывает Бог, а праведнику — по долгу, и нетокмо ему, но и чадом и внучатом его должен. Бог хранящих и помнящих заповеди Его, творящимих, сугубо воздает здесь, и в будущем прославляет праведника, и чад и внучат его.
Псалом: «Господь на небеси уготова престол Свой, и царство Его всеми обладает». Толк. Царствует Господь наш Исус Христос над всею тварию, над верными и неверными, и ельлинами, июдеями, и самими бесами. Не пресекается царство Его, и Его же царствию несть конца. Слыши, никониян, что глаголет пророк, яко вечно царство Господне и не пресекается времены. Аще и блядословишь на погибель себе, не по разуму говоря «Его же царству не будет конца», — и я на тебя не дивлю, понеже пьян ты, упился еси от жены любодеицы, сидящия на водах многих и ездящи на звери червлени. Зело
пряно вино и пьяно питие у блядки! Нарядна, вор блядь: в царской багрянице ездит и из золотой чаши подчивает. Упоила Римское царство, и Полское, и многие окрестные реши да и в Русь нашу приехала во 160 году, да царя с царицею и напоила: так он и пьян стал, с тех мест не проспится, безпрестанно пиет кровь свидетелей Исусовых. Ну,
разумеете ли про жену ту, чада церковная? Всякая ересь блудня глаголется. У еретиков у всех женская слабость: яко же блудница всякого осквернити желает, тако и отступник Никон с товарыщи всех тщится перемазать сквернами любодеяния своего, да же отведет от Бога великия и малыя, богатый и убогия, смиренныя и нищия, старыя и младыя, юноша и девы и ссущия сосца материя младенцы, — всех сих еретик ищет погубить и ко дьяволу
подклонить, дохматствуяразвращенно, и неподобно свидетельствуя о Христе Исусе Господе нашем, глаголя, яко не царствует соверъшенно,
но по судном дни воцарится, и тогда царству Его не будет конца, а ныне, де, царствует верными и покаряющимися Ему, а неверными и иномысленными не царствует совершенно. Вот слушайте, добрые люди, развращеннаго ума их! Вчиняют себя с неверными и иномысленными во исповедании веры, глаголя: «Егда по судном дни воцарится, и тогда царству Его не будет конца». А аще бы оне верни были во Христа, и оне бы с верными и
исповедалиХриста-царя ныне быти и в век: «царствию Его несть конца». А то явно з бесы, да с неверными себя усвоили» да так и веруют. Аще потонку хочешь разумети о сем, прочти в Скрыжали той толк-от их блядивой, да даст ти Господь разум о всем. Мы же, яко веруем, тако и исповедуем: Господьвоцарися в лепоту ся облече, сиречь по страсти и воскресении взыде на небеса и седит со Отцем и со Святым Духом; обладает бо и владеет во веки, и «царствию Его несть конца». Псалом: «Благословите Господа вси ангели Его, силнии крепостию, творящии слово Его, услышатиглас словес Его». Толк. О небесных силах глаголет псалмопевец и о человеках, равноангельно живущих, понеже смотрением своим Господь соединил
небесная со земными, понеже от ангел слава в вышних Богу, ина земли мир в человецех, рождеством Христовым и благим Его изволом. Псалом: «Благословите Господа вся силы Его, слуги Его, творящии волю Его; благословите Господався дела Его, на всяком месте владычества Его; благослови, душе моя, Господа».
Толк. Виждь, пророк созывает: вся дела Господня благословите, еже есть — хвалите или величайте Его, яко смотрением своим освятил есть селение свое Вышний на всяком месте. И ты, душемоя, совсеми величай Господа, яко примирил нас к небесным, бывших врагов, сущих отчюжденных. Неослабно, окаянная, пой Господа и превозношай Его во веки
|
